မြို့ပတ်ရထားတွဲ လမ်းချော်တိမ်းမှောက် လူ (၄)ဦး ဒဏ်ရာရ

Wednesday, 07 September 2011 23:16 |   မြန်မာ့သတင်းရပ်ဝန်းမှ ကူးယူဖော်ပြသည်

ရန်ကုန်မြို့ပတ်ရထားတွဲ ကမာရွတ်ဘူတာနှင့် လှည်းတန်းဘူတာအကြား တိမ်းမှောက်မှုဖြစ်ပွားခဲ့ကြောင်း သိရသည်။ စက်တင်ဘာ ၁ ရက် နေ့လည် ၂ နာရီ ၁၀ မိနစ် အချိန်တွင် အင်းစိန်ဘူတာမှ ရန်ကုန်ဘူတာ ကြီးသို့ ထွက်ခွာလာသော မြို့ပတ်ရထားသည် ကမာရွတ်ဘူတာ အလွန်တွင် လမ်းချော်မှုကြောင့် ရထား နောက်ဆုံးတွဲ တိမ်းမှောက်ကာ လူ (၄) ဦး ဒဏ်ရာရရှိခဲ့ကြောင်း သိရသည်။
“အခုချိန်မှာ ဘာကြောင့်ဖြစ်ရတယ်ဆိုတာကိုတော့ စိစစ်နေဆဲပါ။ ဒဏ်ရာရတဲ့သူတွေကတော့ စိုးရိမ်စရာ မရှိပါဘူး။ သူတို့ကိုလည်း မီးရထားက ဆရာဝန်တွေနဲ့ ရန်ကုန်ပြည်သူ့ဆေးရုံကြီးမှာ ဆေးကုမှုခံယူနေ ပါတယ်” ဟု မြန်မာ့မီးရထားမှ သွားလာရေး မန်နေဂျာ ဦးသိန်းနိုင်က အခင်းဖြစ်ပွားရာနေရာတွင်
ပြောကြားခြင်း ဖြစ်သည်။
အဆိုပါဖြစ်စဉ်ကြောင့် ဒဏ်ရာရရှိသွားသော ၄ ဦးကို မြန်မာ့မီးရထားမှ ကျန်းမာရေးထောက်ပံ့ငွေ ကျပ်ငါးသောင်းစီ အကူအညီပေးထားကြောင်း ယင်းက ဆက်လက်ပြောကြားသည်။ ယင်းဖြစ်စဉ်ကြောင့် ရန်ကုန်မှ ပြည်သို့ထွက်ခွာမည့် ရန်ကုန်-ပြည်အမြန်ရထားနှင့် ပုဂံရထားတို့ သွားလာမှုကို ခေတ္တခဏမျှ ရပ်နားထားကြောင်း သိရသည်။
“အခုရထားကို လမ်းကြောင်းပေါ် တင်ပြီးသွားရင်တော့ အမြန်ရထားတွေ ပြန်သွားလို့ရနေပါပြီ။ မြို့ပတ်ရထားတွေကတော့ ရန်ကုန်ကနေ ကြည့်မြင်တိုင်၊ အင်းစိန်ကနေ ရန်ကုန်ကို ပတ်ပြီး ပြေးဆွဲနေပါတယ်”ဟု ယင်းက ဆိုသည်။
အဆိုပါ ရထားတိမ်းမှောက်ခဲ့သည့် မြို့ပတ်ရထားသည် လူစီးတွဲဆိုင်း ၆ တွဲပါပြီး နောက်ဆုံးအတွဲမှ တိမ်းမှောက်သွားခြင်း ဖြစ်ကြောင်း သိရသည်။ ယင်းရထားတိမ်းမှောက်မှုကြောင့် ရထားလမ်းမှာ အနည်းငယ်ပျက်စီးသွားသောကြောင့် ဇလီဘားတုံး ၂၀ ခန့် ပြန်လည်ပြုပြင်ခဲ့ရကြောင်း သိရသည်။
အဆိုပါ မြို့ပတ်ရထား တိမ်းမှောက်ဖြစ်စဉ်ကို စုံစမ်းစစ်ဆေးသွားပြီး အရေးယူဆောင်ရွက်သွားမည်ဖြစ်ကြောင်း မြန်မာ့မီးရထားသွားလာရေး မန်နေဂျာ ဦးသိန်းနိုင်က ဆိုသည်။
“ဒီနေရာလွန်ခဲ့တဲ့ လေးငါးလတုန်းကလည်း မီးရထားတွဲဆိုင်း ၂ ဆိုင်းလမ်းချော်ခဲ့ဖူးတယ်။ အဲ့ဒီတုန်းကတော့ အခုလောက်ကြီး ရထားက မတိမ်းမှောက်ဘူး။ နည်းနည်းလေးပဲ စောင်းသွားတယ်။ လူတွေလည်း ဒဏ်ရာမရပါဘူး”ဟု ကမာရွတ် လေးရပ်ကွက်ပတ္တမြားလမ်းတွင် ကုန်စိမ်းရောင်းချ လျက်ရှိသည့် အသက် ၄၀ အရွယ် အမျိုးသမီးတစ်ဦးက ဆိုသည်။
အဆိုပါ တိမ်းမှောက်သွားသည့် ရထားတွဲကို မလွှကုန်း ဒီဇယ်ကရိန်းအဖွဲ့မှ ညနေ ၆ နာရီကျော်တွင် မီးရထားသံလမ်းပေါ်သို့ ပြန်လည်တင်ပေးနိုင်ခဲ့ပြီး အဆိုပါ တိမ်းမှောက်သည့် ရထားကို အင်းစိန်ဘူတာသို့ ပြန်လည်ဆွဲယူသွားကြောင်း သိရသည်။
Ref: The Flower News