ခိုးဝင်တဲ့ မြန်မာ ၆၁ ယောက် အဖမ်းခံရ

Friday, April 29, 2011

(ဓာတ်ပုံ - Manager Online)

ထိုင်း-မြန်မာနယ်စပ် မဲဆောက်မြို့ကနေ တဆင့် ဘန်ကောက်မြို့ကို အလုပ်သွားလုပ်ဖို့ ကြိုးစားနေကြတဲ့ အမျိုးသမီး၊ အမျိုးသား ၆၁ ယောက်ကို ထိုင်း အာဏာပိုင်တွေက မနေ့က ဖမ်းဆီး လိုက်တယ်လို့ ထိုင်းဘာသာနဲ့ ရေးသား ထားတဲ့ မန်နေဂျာ အွန်လိုင်း (Manager Online) အင်တာနက် စာမျက်နှာမှာ ဖော်ပြထားပါတယ်။

အမျိုးသား ၅၆ ယောက်၊ အမျိုးသမီး ၅ ယောက်နဲ့ အတူ ဘန်ကောက်မြို့ကို ဦးတည် သွားဖို့ ကြိုစားနေတဲ့ အချိန်မှာ ထိုင်း အာဏာ ပိုင်တွေရဲ ဖမ်းဆီးမှုကို ခံလိုက်ရတာပါ။ အဖမ်းခံရတဲ့ သူတွေကတော့ မြန်မာနဲ့ ကရင်တိုင်းရင်းသားတွေ ဖြစ်တယ်လို့ သိရပါတယ်။

မြန်မာပြည်သားတွေကို ထိုင်း အာဏာပိုင်တွေက စစ်ဆေးတော့ တရားဝင် စာရွက်စာတမ်းတွေ မရှိတဲ့အတွက် အားလုံးကို မဲဆောက် မြို့မှာ ရှိတဲ့ လူဝင်မှု ကြီးကြပ်ရေး (လ၀က) အချုပ်က မြ၀တီမြို့ တဖက်ကမ်းသို့ ပို့ဆောင်သွားမယ်လို့ ဆိုပါတယ်။

ဒီလို အဖမ်းခံရတဲ့ အမျိုးသား၊ အမျိုးသမီးတွေက ကယ်ရီနဲ့ လာသလားဆိုတာကို မသိသေးဘူး၊ ဒါပေမယ့် ကယ်ရီနဲ့ လာတယ် ဆိုရင်တော့ အဖမ်းလည်း ခံရပြီး ပိုက်ဆံလည်း ရှုံးသွားနိုင်ပါတယ်။ ဘန်ကောက်ကို သွားဖို့ လူတယောက်ကို ကယ်ရီခ ဘတ်ငွေ အနည်းဆုံး (၁၆၀၀၀) လောက် ပေးရတယ်လို့ သိရပါတယ်။ တချို့ကယ်ရီတွေကတော့ အဖမ်းခံရတဲ့ လူတွေကို အကူအညီပေး တာ ရှိပါတယ်။ ကယ်ရီအားလုံးတော့ မဟုတ်ဘူး။

မြန်မာပြည် စစ်အစိုးရလက်အောက်မှာ စားဝတ်နေရေး ကျပ်တည်းနေတဲ့ အတွက် အိမ်နီးချင်းနိုင်ငံတွေကို နည်းမျိုးစုံနဲ့ ဝင်ရောက် လာတဲ့ မြန်မာနိုင်ငံသားတွေ ရှိနေဆဲပါပဲ။ အခက်အခဲ မျိုးစုံ တွေ့ရပေမယ့် အဆင်ပြေလိုပြေငြား စွန့်စားကြရပြီး အခုလို ဒုက္ခရောက် ကြရ၊ မျက်နှာငယ်ကြရတာလည်း ရှိပါတယ်။

သန်းထိုက်ဦး