ထိုင်းက အအေးခန်း ကုန်တင်ယာဉ်နဲ့ မြန်မာပြည်သား

သန်းထိုက်ဦး (ဧရာဝတီ မှ ကူးယူဖော်ပြသည်)
ဘန်ကောက်ကို အအေးခန်း ကုန်တင်ယာဉ်ထဲ ပုန်းပြီး သွားသူတွေ အဆင်ပြေအောင် လူကယ်ရီတွေက စီစဉ်ထားပါတယ်။ ကားမှာ လေပေါက်ဖောက်၊ ပန်ကာတပ်ထားတဲ့ နည်းလမ်းပါ။

(လေပေါက်ဖောက်မထားရင် ကုန်ကားထဲ လေအေးစက်ပျက်ပြီး လိုက်ပါလာသူတွေ သေဆုံးဖူးတာကြောင့် ဒီနည်းလမ်းက အဆင်ပြေပါတယ်)

ကုန်ကားထဲမှာ အသက်ရှုလို့ရတဲ့အတွက် ကံကောင်းတယ်လို့ ဆိုရမှာပါ။ ဒါပေမယ့် ကံဆိုးချင်တော့ စစ်ဆေးရေးဂိတ်တခုမှာ မြန်မာပြည်သားတွေ အစုလိုက် အပြုံလိုက် အဖမ်းခံထိပါတယ်။
အဲဒါကတော့ စနေနေ့က ကော့သောင်း - ရနောင်းဒေသက ထွက်သွားတဲ့ ကား ၂ စီးထဲမှာ ပုန်းပြီး လိုက်သွားတဲ့ ၃၅ ယောက် ဖြစ်ပါတယ်။

၃၅ ဦးကို တင်လာတဲ့ ကား (ဓာတ်ပုံ - dailynews.co.th)

အခုလို အဖမ်းခံရတာဟာ အာဏာပိုင်းတွေက ကြိုတင် သတင်းရထားလို့ ဖြစ်တယ် ဆိုပြီး ထိုင်းသတင်းတွေမှာ ရေးသားထားပါတယ်။
အအေးခန်းကားကို မောင်းနေတဲ့ ကားသမားတွေကိုလည်း အာဏာပိုင်တို့က ဖမ်းလိုက်တယ်လို့ သိရပါတယ်။

မဲဆောက်မြို့အထွက်က အဖမ်းအဆီး

ဒီကနေ့ ထိုင်း-မြန်မာနယ်စပ် မဲဆောက်မြို့ အထွက် စစ်ဆေး ရေးဂိတ်မှာ ၂၆ ယောက် အဖမ်းခံရပါတယ်။
အမျိုးသမီး နဲ့ အမျိုးသား ၁၃ ယောက်စီ ဖြစ်ပါတယ်။ ဘန်ကောက်သွားဖို့ ကြိုးစားသူတွေပါ။

မဲဆောက်ဂိတ်မှာတော့ ကားသမားကို မဖမ်းနိုင်ခဲ့ပါဘူး။ စစ်ဆေးရေးဂိတ် မရောက်ခင်မှာ ကားကို လမ်းဘေး ထိုးရပ်ပြီးတော့ ထွက်ပြေးသွားတယ်လို့ ထိုင်းသတင်းတွေက ဆိုပါတယ်။

ဘယ်လို အရေးယူမလဲ
ကားမောင်းသူတွေဟာ ထိုင်း ဥပဒေအရ လူကုန်ကူးမှုနဲ့ အရေးယူခံရနိုင်ပါတယ်၊ မြန်မာနိုင်ငံသားတွေကတော့ ထိုင်း နိုင်ငံကို ခိုးဝင်မှုနဲ့ အရေးယူခံရနိုင်ပါတယ်။ တရားမ၀င် နေထိုင် သွားလာတဲ့ မြန်မာပြည်သားတွေဟာ ထိုင်း အချုပ်ခန်း၊ ထောင်တွေထဲမှာ ကြာကြာ မနေရပါဘူး။ နယ်စပ်ကို ရက်ပိုင်းအတွင်း ပြန်ပို့ခံရတတ်ပါတယ်။