သီပေါမင်းတရားကြီးနှင့် မိဖုရားခေါင်ကြီး စုဖုရားလတ်တို့၏ မြေးတော် တစ်ဦးဖြစ်သော တော်ဘုရားလေး (ဦး) အောင်ဇေကို ၁၉၂၆ ခုနှစ်၊ ဇွန်လ ၃ဝ ရက်နေ့တွင် အဖ ဦးကိုကိုနိုင်၊ အမိ
အရှင်ထိပ်စု မြတ်ဘုရားလေးတို့မှ ရန်ကုန်မြို့၌ မွေးဖွားခဲ့သည်။
၁၉၄၈ မှ ၁၉၆၂ ခုနှစ်များ အတွင်း သီပေါရောင်းဝယ်ရေး ဆင်ဒီကိတ် တည်ထောင်ပြီး ဒါရိုက်တာ အဖြစ် ဆောင်ရွက်ကာ တိုကျိုနှင့် အိုဆကာတို့တွင် ရုံးခွဲများ ဖွင့်လှစ်ခဲ့သည်။ ၁၉၅ဝ ပြည့်နှစ်တွင် ပြည်ထောင်စု မြန်မာနိုင်ငံတော် ထွက်ကုန် ကုန်သည်များ အသင်းချုပ်တို့ကို တည်ထောင်ခဲ့ကာ အထွေထွေ အတွင်းရေးမှူး အဖြစ် လုပ်ကိုင် ဆောင်ရွက်ခဲ့သည်။ ၁၉၅၃ ခုနှစ်တွင် ပြည်ထောင်စု မြန်မာနိုင်ငံတော် ထုတ်ကုန် ကုန်သည်များ အရှေ့ဖျား ကော်ပိုရေးရှင်းကို ဖွဲ့စည်းပြီး ဒါရိုက်တာ အဖြစ် တာဝန်ယူ ဆောင်ရွက်ရင်း ကိုယ်ပိုင် စီးပွားရေး လုပ်ငန်းများ လုပ်ကိုင်ခဲ့သည်။ ထိုင်း၊ ဟောင်ကောင်၊ အိန္ဒိယ၊ ဂျပန်တို့သို့လည်း သွားရောက်ခဲ့သည်။ ၁၉၆ဝ ပြည်နှစ်တွင် တရုတ်နိုင်ငံ၊ မြောက်ကိုရီးယား၊ ၁၉၆၁ ခုနှစ်တွင် တရုတ်နိုင်ငံတို့သို့ မြန်မာအစိုးရ စီးပွားရေး မစ်ရှင်ဖြင့် သွားရောက်ခဲ့သည်။
၁၉၅၅ - ၅၈ ခုနှစ်တွင် --- အဖွဲ့ချုပ်တွင် ဗဟို စည်းရုံးရေးမှူး အဖြစ် တာဝန် ယူခဲ့သည်။ ၁၉၅၇ - ၆၄ ခုနှစ်တွင် ပြည်တွင်း ငြိမ်းချမ်းရေး အဖွဲ့ ဌာနချုပ်၊ ကမ္ဘာ့ ငြိမ်းချမ်းရေး ကွန်ဂရက် (မြန်မာနိုင်ငံ)၊ အာရှ - အာဖရိက သွေးစည်း ညီညွတ်ရေး အဖွဲ့တွင် ဗဟို အလုပ်အမှုဆောင် အဖွဲ့ဝင်၊ တရုတ်ဖြူ ကျူးကျော်မှုနှင့် နယ်ချဲ့ ဆန့်ကျင်ရေး အမျိုးသား ကော်မတီ ဌာနချုပ် ဘဏ္ဍာရေးမှူး၊ ၁၉၆၁ ခုနှစ်တွင် မြန်မာ - ကိုးရီးယား မိတ်ဆွေဖြစ် အသင်း၊ ၁၉၆၄ ခုနှစ်တွင် MEIC (မြန်မာ့ ထုတ်ကုန် သွင်းကုန် ကော်ပိုရေးရှင်း) ရုံးချုပ် အုပ်ချုပ်ရေး မန်နေဂျာတို့ အဖြစ် ပါဝင် လုပ်ကိုင် ဆောင်ရွက်ခဲ့ပြီး ၁၉၆၅ ခုနှစ်တွင် တာဝန်မှ အနားပေးခြင်း ခံခဲ့ရသည်။
၁၉၈၈ ခုနှစ် အောက်တိုဘာလတွင် မြန်မာပြည် တိုးတက်ရေး လူငယ် အဖွဲ့ချုပ်၌ နာယက အဖြစ် တာဝန်ယူခဲ့ပြီး တပ်ပေါင်းစု ဖွဲ့စည်းရေး၊ ကြားဖြတ်အစိုးရ တောင်းဆိုရေးတို့တွင် ပါဝင်ခဲ့သည်။ အမျိုးသား နိုင်ငံရေး တပ်ပေါင်းစု (မနတ) တွင် နာယက လုပ်ကိုင်ခဲ့ပြီး အမျိုးသား ညီညွတ်ရေး တပ်ပေါင်းစု၏ ၁၈ ဖွဲ့တွင် အဖွဲ့ဝင် အဖြစ် ပါဝင်ခဲ့သည်။ ၁၉၈၉ ခုနှစ်၊ ဇွန်လ ၂၉ ရက်နေ့ အာဏာဖီဆန်ရေး တရားပွဲ၌ အစိုးရအမိန့် ဥပဒေများမှာ အမြဲတစေ မှန်ကန်မှု မရှိ၍ အစိုးရနှင့် မပူပေါင်းရေး၊ အကြမ်းမဖက်ရေး တို့ကို ဆွေးနွေး ဟောပြောခဲ့သည်။ ၁၉၆၈ ခုနှစ်မှ ၁၉၇ဝ ပြည့်နှစ် အထိ တစ်ကြိမ်၊ ၁၉၈၈ ခုနှစ် နောက်ပိုင်း စစ်အစိုးရ တက်လာပြီးနောက် တစ်ကြိမ် ဖမ်းဆီး ထိန်းသိမ်း ခံခဲ့ရသည်။
အင်္ဂလိပ်စာ နည်းပြဆရာ အဖြစ် နှစ်ပေါင်း ၃ဝ ကျော် လုပ်ကိုင်ခဲ့ပြီး၊ သမိုင်းသုတေသန စာတမ်း ရေးသားမှုများ ပြုလုပ်ခဲ့ကာ စာပေနယ်ဘက်တွင်လည်း ဆောင်းပါး အမြောက်အများနှင့် စာအုပ်များ ရေးသား ထုတ်ဝေခဲ့သည်။ မကွယ်လွန်မီ အထိ စာပေ ရေးသားမှုများ ပြုလုပ်ခဲ့ပြီး အမှတ် ၁၅၉/က၊ ရွှေတိဂုံ ဘုရာလမ်း၊ ဒဂုံမြို့နယ်တွင် နေထိုင်ခဲ့သည်။
No comments:
Post a Comment