မဲဆောက်-မြ၀တီ ကမ်းနား ပြေးဆွဲနေသည့် ထိုင်းမော်တော်ယာဉ်လိုင်းများ
ဆန္ဒပြအရေးဆိုမှု ပြုလုပ်တော့မည်
သတင်း - မြနှယ်စိမ်းစိမ်း (အင်းစိန်)
မတ်လ ၁၂ ရက်၊ ၂၀၁၂ ခုနှစ်
မဲဆောက်မြို့တွင် မြန်မာနိုင်ငံ မြ၀တီဘက်မှ ခရီးသည်တင်မော်တော်ယာဉ် အစီးရေ ၁၀၀ ကျော် နေ့စဉ် ၀င်ရောက် ပြေးဆွဲနေသည့်အတွက် ထိုင်းမော်တော်ယာဉ်လိုင်းများ နစ်နာဆုံးရှုံးမှုများနှင့် ကြုံတွေ့နေရသဖြင့် ဆန္ဒပြအရေးဆိုမှုများ ပြုလုပ်တော့မည်ဟု မဲဆောက်-မြ၀တီ ကမ်းနား ပြေးဆွဲနေသည့် ထိုင်းယာဉ်မောင်းများက ပြောသည်။
ထိုင်းယာဉ်မောင်းတဦးဖြစ်သည့် နိုင်စုံချိုင်းက “ကျနော်တို့ ယာဉ်လိုင်းက အစီးရေ ၆၀ နီးပါး ရှိတယ်။ ကားတစီး တနေ့ သုံးလေးခေါက်ရဖို့ မလွယ်ဘူး။ ဒီအနေအထားနဲ့ ရေရှည်ရပ်တည်ဖို့ ခက်တယ်။ မဲဆောက်ကို လာတဲ့ မြန်မာခရီးသည်တင်ကားက တနေ့ကို အစီးရေ ၁၀၀ အထက်မှာ ရှိတယ်။ မြန်မာကားတွေ စနစ်တကျ ပြေးဆွဲဖို့ ထိုင်းတာဝန်ရှိသူတွေကို တင်ပြထားတာရှိပေမယ့် ဒီနေ့အထိ အဆင်ပြေအောင် စီစဉ်ပေးတာ မရှိသေးဘူး။ ဒီရက်ပိုင်းမှာမှ အဆင်မပြေရင် ကျနော်တို့ဘက်က မြန်မာကားတွေကို ဆန္ဒပြဖို့ အစီအစဉ်ကို လုပ်ရတော့မယ်” ဟု ပြောသည်။
ထိုင်းယာဉ်မောင်းများ၏ အဆိုအရ စည်းကမ်းတကျ သွားလာပြေးဆွဲခြင်းမရှိဘဲ မဲဆောက်မြို့တွင်းမြို့ပြင်ရှိ လူနေရပ်ကွက်များနှင့် အလုပ်ရုံစက်ရုံများသို့ ခရီးသည်များ လိုက်လံပို့ဆောင်ခေါ်ယူခြင်းများကြောင့် သတ်မှတ်လမ်းကြောအတိုင်းသာ ပြေးဆွဲနေရသော ထိုင်းယာဉ်လိုင်းများမှာ ခရီးသည်များ မရရှိကြကြောင်း မြန်မာကားဂိတ်ကို မဲဆောက်တွင် ထိုင်းအာဏာပိုင်များက သီးသန့်သတ်မှတ်၍ အလှည့်ကျစနစ်ဖြင့် ပြေးဆွဲမှုကို စီစဉ်ဆောင်ရွက်ပေးသင့်သည်ဟုလည်း ၎င်းက ဖြည့်စွက် ပြောကြားသည်။
လက်ရှိ မဲဆောက်-မြ၀တီ ကမ်းနားသို့ ပြေးဆွဲနေသည့် ထိုင်းခရီးသည်တင်ကားမှာ အစီးရေ ၆၀ ခန့်ရှိပြီး မြန်မာနိုင်ငံ မြ၀တီနှင့် မဲဆောက်သို့ နေ့စဉ် ပြေးဆွဲနေသည့် မြန်မာခရီးသည်တင် မော်တော်ယာဉ်များနှင့် ကုန်တင်ကားငယ်များမှာ အစီးရေ ၁၀၀ ကျော်ခန့် ရှိသည်ဟု သိရသည်။
မြ၀တီ-မဲဆောက်လမ်းကြောတွင် ယခင်လဆန်းကစ၍ မြ၀တီရှိ ရွှေမြန်မာ ခရီးသည်တင်ယာဉ်လိုင်းမှ အစီးရေ ၉၀ ခန့်နှင့် ယခုလ ၃ရက်နေ့က စတင်ပြေးဆွဲသည့် တိုးတက်သော ဗုဒ္ဓဘာသာ ကရင်အမျိုးသားတပ်မတော် (DKBA) ကလို့ထူးဘောအဖွဲ့မှ ယာဉ်အစီးရေ ၄၀ နှင့် မြ၀တီအခြေစိုက် အစိုးရဌာနဆိုင်ရာများမှ နားလည်မှုဖြင့် ပြေးဆွဲခွင့်ပြုထားသည့် တရားမ၀င် ကုန်တင်ကားငယ်များ ၁၀ စီးကျော် အပါအ၀င် နေ့စဉ် မြန်မာကားအစီးရေ ၁၀၀ ကျော် ပြေးဆွဲလျက်ရှိသည်။
မြ၀တီ-မဲဆောက် ပြေးဆွဲသည့် DKBA ကလို့ထူးဘော မော်တော်ယာဉ်လိုင်းမှ တာဝန်ရှိသူတဦးက လက်ရှိ မြန်မာယာဉ်လိုင်းများအပြင် အခြားကရင်ငြိမ်းချမ်းရေးအဖွဲ့တခုမှလည်း မဲဆောက်-မြ၀တီယာဉ်လိုင်းကို မကြာမီ ပြေးဆွဲရန် စီစဉ်နေသည်ဟု ပြောသည်။
မြန်မာခရီးသည်တင်ကားအစီးရေ ၁၀၀ ကျော်သည် မြ၀တီမှ မဲဆောက်သို့ ခရီးသည်တဦးလျှင် ထိုင်းဘတ်ငွေ ၅၀ နှုန်းဖြင့် ခရီးသည် ၂,၀၀၀ ခန့်ကို နေ့စဉ် ပို့ဆောင်ပေးလျက်ရှိပြီး အပြန်ခရီးတွင်လည်း ခရီးသည် ၁,၀၀၀ နီးပါးခန့် ရရှိသည်ဟု မြန်မာယာဉ်လိုင်း တာဝန်ရှိသူတဦးက ပြောသည်။
ထိုင်းယာဉ်မောင်းတဦးက “ထိုင်းအာဏာပိုင်တွေဘက်က ကိုယ့်လူမျိုးတွေဘက်က မရပ်တည်ဘူးဆိုရင်တော့ ပြဿနာတွေက ပိုပြီး ရှုပ်ထွေးလာနိုင်တယ်။ အခုကိစ္စမှာလည်း ထိုင်းဌာနဆိုင်ရာအချို့ရဲ့ မရိုးသားမှုနဲ့ တာဝန်ပျက်ကွက်မှုတွေကြောင့် ဒီအနေအထားတွေ ဖြစ်နေတာ” ဟု ဆိုသည်။
ထိုင်းဘက်ခြမ်း နယ်စပ်ချစ်ကြည်ရေးတံတားမှ မဲဆောက်သို့ ပြေးဆွဲနေသည့် ထိုင်းခရီးသည်တင် ယာဉ်စီးခမှာ ခရီးသည်တဦးလျှင် ထိုင်းဘတ်ငွေ ၂၀ ဖြစ်သည်။ မြ၀တီမှ မဲဆောက်သို့ နေ့စဉ် မြန်မာနိုင်ငံသားများ သောင်းဂဏန်းခန့် သွားရောက်ကြသည့်အနက် ချစ်ကြည်ရေးတံတားမှတဆင့် တရားဝင် သွားရောက်သည့် အရေအတွက်မှာ ၂,၀၀၀ ခန့်သာရှိပြီး ကျန်အရေအတွက်များမှာ ချစ်ကြည်ရေးတံတား၏ ဘေးဝဲယာရှိ လှေဂိတ်များမှတဆင့် တရားမ၀င် သွားရောက်ကြခြင်းဖြစ်သည်။
လွန်ခဲ့သည့် ၂ နှစ်ကျော်က ထိုင်းခရီးသည်ယာဉ်လိုင်းက မြန်မာမော်တော်ယာဉ်များ ပြေးဆွဲမှုကို စနစ်တကျ ရှိစေရန် ဆန္ဒပြအရေးဆိုသည့်အနေဖြင့် ချစ်ကြည်ရေးတံတား ထိုင်းဘက် ၀င်ပေါက်ကို ထိုင်းခရီးသည်တင်ကား အစီး ၆၀ ခန့်နှင့် ပိတ်ဆို့ခဲ့သဖြင့် နှစ်နိုင်ငံချစ်ကြည်ရေး တင်းမာမှုများ ဖြစ်ပွားခဲ့သည့်အပြင် မြန်မာဘက်က ချစ်ကြည်ရေးတံတားကို ဖွင့်ချီပိတ်ချီ ပြုလုပ်ခဲ့သဖြင့် နယ်စပ်ကုန်သွယ်ရေးကို ထိခိုက်မှုများ ရှိခဲ့သည်ဟု နှစ်နိုင်ငံ ကုန်သည်ကြီးများအသင်းက ပြောသည်။
မဲဆောက်မြို့တွင် နေ့စဉ်ပြေးဆွဲနေသည့် မြန်မာယာဉ်လိုင်းများနှင့် မြန်မာခရီးသွားများ
No comments:
Post a Comment