ချင်းမိုင် (မဇ္စျိမ) ။ ။ ဗဟိုအစိုးရ၏ ကမ်းလှမ်းမှု မဟုတ်သဖြင့် အပစ်ခတ်ရပ်စဲရန် ထပ်မံ ကမ်းလှမ်းလာသည်ကို ကချင်လွတ်မြောက်ရေးအဖွဲ့ က ထပ်မံပယ်ချလိုက်ကြောင်း KIO တွဲဘက်အတွင်းရေးမှူး ဦးလနန်က ပြောသည်။
“ အစိုးရဘက်မှ အပစ်ရပ်ထားတယ် ဆိုပေမယ့် ရှေ့တန်းမှာက ပစ်ခတ်နေတာပဲ။ အဲဒါကို ဘယ်လိုလို့ အသိအမှတ်ပြုမလဲ။ ကြည့်လေ စပြီး တိုက်လာတာက သူတို့ လွှတ်တော် အစိုးရတွေ မဟုတ်ဘူးလေ။ စစ်တပ်က စပစ်တာပဲ။ အဲဒီလို အပစ်ရပ်ဆိုင်းရင် တွေ့ဆုံ ဆွေးနွေးရေး အတွက် သက်သေပြယုဂ်တခု ဖြစ်ပါလိမ့်မယ်ဆိုတဲ့ အကြံပြုစာ ဖြစ်တယ်။ ဒီစာက အရင်ကတည်းကနေ ဦးသိန်းဇော်ပြောတဲ့ စကားတွေပဲ။ အဲဒါက ကျနော်တို့ အသိအမှတ်ပြုလို့ မရဘူး” ဟု ဦးလနန်က မဇ္ဈိမကို ပြောသည်။
ပြည်နယ်အစိုးရက ဖွဲ့စည်းထားသော ငြိမ်းချမ်းတည်ငြိမ်းရေးနှင့် ညှိနှိုင်းရေးအဖွဲ့မှ သယ်ဆောင်လာသော ပြည်နယ် နယ်စပ်လုံခြုံရေးရာ ဝန်ကြီး ဦးသန်းအောင်က လက်မှတ်ရေးထိုးထားသော စာတွင် အစိုးရ စစ်တပ်ဘက်မှ ပစ်ခတ်မှု ရပ်ဆိုင်းထားပြီးဖြစ်၍ KIO ဘက် အပစ်အခတ် ရပ်ပေးရန် ပါရှိသည်။
စစ်ပွဲများ ဖြစ်ပွားခဲ့ပြီးနောက် အစိုးရကိုယ်စားလှယ်နှင့် တွေ့ဆုံဆွေးနွေးအပြီး တပတ်အကြာတွင် ငြိမ်းတည်ညှိအဖွဲ့မှ ကချင်အတိုင်ပင်ခံ ဦးဆင်ဝါးနော်က ပြည်နယ်အစိုးရ၏ အပစ်ရပ်စာကို ယူလာခဲ့ခြင်း ဖြစ်သည်။
“အစိုးရ စစ်တပ်ဘက်က ရှေ့တန်းကို ညွှန်ကြားတဲ့ သက်သေ အထောက်အထား၊ အမိန့်စာ မဟုတ်ရင်တောင် အဲဒီလို အမိန့်စာ အဓိပ္ပာယ် သက်ရောက်နိုင်တဲ့ တပ်ပိုင်းဆိုင်ရာ အရာရှိတဦးဦး လက်မှတ်ထိုးထားတာကို ကျနော်တို့ လိုချင်တာပဲ” ဟု ဦးလနန်က ဆိုသည်။
KIO က နေပြည်တော်နှင့် တိုက်ရိုက်ဆွေးနွေးမှု ပြုလုပ်လိုချိန်တွင် သမ္မတ ဦးသိန်းစိန်အစိုးရက ပြည်နယ် အစိုးရဖြင့်သာ လွှဲထားခြင်းမှာ ကချင်ပြည်နယ်အတွင်း အစိုးရတပ်များ ခြေကုတ်ယူနိုင်ရန် အချိန်ဆွဲထားမှာကို သံသယဖြစ်ဖွယ် ရှိကြောင်း လေ့လာသူများက ပြောသည်။
ဦးလနန်ကတော့ “ အပစ်အခတ် ရပ်ဆိုင်းရေးက တကမ္ဘာလုံးသိရမယ့် အလုပ်ပဲ။ ကမ္ဘာသိအောင် ဘာဖြစ်လို့ ဖွင့်မပြောပြနိုင်တာလဲ ဆိုတာက ပြောစရာ ဖြစ်နေတယ်” ဟု ပြောသည်။
ငြိမ်းတည်ညှိအဖွဲ့ကို ကချင်ပြည်နယ် ဝန်ကြီးချုပ် ဦးလဂျွန်ငံဆိုင်းက နယ်စပ်ဒေသ လုံခြုံရေးနှင့် ဖွံ့ဖြိုးရေးဝန်ကြီး ဗိုလ်မှူးကြီးသန်းအောင်၊ ကချင်အမျိုးသား အတိုင်ပင်ခံ ဥက္ကဋ္ဌ ဦးဆင်ဝါးနော်၊ UDPKS ပါတီမှ အမျိုးသားလွှတ်တော် ဦးခက်ထိန်နန်၊ မြောက်ပိုင်းတိုင်း တိုင်းစစ်ဌာနချုပ် စစ်ဦးစီး ပထမတန်း ဗိုလ်မှူးကြီး ထွန်းထွန်းအုန်းနှင့် စစ်ဘက်ရေးရာ လုံခြုံရေး စစ်ဆေးရေးဌာန ဗိုလ်မှူးနိုင်လင်းတို့ အပါအဝင် ၅ ဦးကို ဖွဲ့စည်းခဲ့သည်။
သို့သော်လည်း ဇွန်လ ၃ဝ ရက်တွင် ပထမဆုံး နှစ်ဘက် တွေ့ဆုံပွဲသို့ အဖွဲ့အတွင်း အရေးပါသူ ဗိုလ်မှူးကြီး ထွန်းထွန်းအုန်း လိုက်ပါမလာခဲ့ပေ။
အပစ်ခတ်ရပ်စဲရေး သဘောတူညီမှု မရသော်လည်း ကြားဝင်စေ့စပ်မှုမှာ တိုးတက်မှုရှိသည်ဟု အစိုးရ ကိုယ်စားလှယ် တဦးဖြစ်သူ ကချင်အမျိုးသား အတိုင်ပင်ခံ ဦဆင်ဝါးနော်က မဇ္စျိမကို ပြောသည်။
“ခု ၂၅ ရာခိုင်နှုန်း အောင်မြင်လာပြီလို့ ပြောလို့ရမယ်။ နှစ်ဖက်တိုက်ပွဲကြီးတွေ ဖြစ်လာတာ မရှိတဲ့အတွက်
အောင်မြင်တယ်လို့ ပြောလို့ရမယ်။ လိုင်ဇာလမ်းပေါ်လည်း ပုံမှန်သွားလာနေတာတွေ တွေ့ရရင် အောင်မြင်တယ်လို့
ပြောရမယ်” ဟု သူက ဆိုသည်။
ဇွန် ၅ ရက်တွင် မြစ်ကြီးနား-မန္တလေး မီးရထားသံလမ်းကို KIA (KIO ၏ တပ်) က မိုင်းထောင် ဖောက်ခွဲဖျက်ဆီးသဖြင့် စလီဖားတုံးများ ဖျက်ဆီးခဲ့သည်ဟု အစိုးရက ကြာသပတေးနေ့ထုတ် နိုင်ငံပိုင် သတင်းစာမှတဆင့် ထုတ်ပြန်သည်။
သို့သော် ၎င်းမှာ KIO လက်ချက်မဟုတ်ကြောင်း ဦးလနန်က ငြင်းဆန်လိုက်ပြီး “အစိုးရကို မုန်းတဲ့ လူတွေ အများကြီး။ တောမီးလောင် တောကြောင် လက်ကမောင်းခတ် အများကြီးပဲလေ” ဟု ပြောသည်။
KIO အနေဖြင့် ဇွန် ၃ ရက်ကတည်းက အစိုးရထိန်းချုပ်ရာ နယ်မြေအတွင်း ဝင်ရောက်ဖျက်ဆီးခြင်းနှင့် လက်ဦးမှု အရယူ တိုက်ခိုက်ခြင်းများ မပြုလုပ်ရန် ရှေ့တန်းတပ်ဖွဲ့များကို ညွှန်ကြားထားသည်ဟု ထပ်မံပြောသည်။ သို့သော်လည်း အပစ်ခတ်ရပ်စဲမှု မဟုတ်ကြောင်း ကြေညာထားသည်။
No comments:
Post a Comment