2011-07-09
ရန်ကုန်တိုင်း တောင်ဥက္ကလာပမြို့နယ် (၁၂) ရပ်ကွက် အုပ်ချုပ်ရေးမှူးနေရာမှာ မူးယစ်ဆေးဝါးမှု နဲ့ ထောင်ကျဖူးသူ ကြံ့ခိုင်ဖွံ့ဖြိုးရေး ပါတီဝင်တဦးကို အစားထိုး ခန့်အပ်လိုက်တာနဲ့ ပတ်သက်ပြီး ရပ်ကွက်နေ လူတချို့က မကျေနပ်တဲ့အတွက် ပြည်ထဲရေး ဝန်ကြီးဌာနကို လက်မှတ်ထိုး တိုင်ကြား ကန့်ကွက်ထားတယ်လို့ သိရပါတယ်။
ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ ရုံးခွဲတခုရှေ့တွင် ပါတီအမှတ်တံဆိပ် ချိတ်ဆွဲထားပုံ ဖြစ်ပါသည်။ (Photo: RFA)
ရာဇဝတ်မှု ကျူးလွန်ခဲ့သူကို ရပ်ကွက် အုပ်ချုပ်ရေးမှူး ခန့်အပ်တာဟာ အခြေခံဥပဒေနဲ့ မညီညွတ်တဲ့အတွက် သူ့အနေနဲ့ လွှတ်တော်အတွင်းကိုတင်ပြပြီး ကန့်ကွက်သွားမယ်လို့ ဦးဖုန်မြင့်အောင် က RFA ကို ပြောပါတယ် ။
“တယောက်နဲ့ တယောက် အကြောင်းသိတွေ ဆိုတော့ သူတို့က ရက်စွဲနဲ့ အမှုအတိအကျနဲ့၊ မူးယစ်ဆေးဝါးအမှု ပေါ့ဗျာ စာနဲ့ပေနဲ့ ရေးတာကိုး။ ပိုင်ပိုင်နိုင်နိုင် ရေးတာပါ။ ဖွဲ့စည်းပုံ အခြေခံဥပဒေထဲမှာ ရပ်ကွက် အုပ်ချုပ်ရေးမှူးက ထောင်ထွက် မဟုတ်ရဘူးဆိုတာ ပါတာပေါ့။ ကျနော့်အနေနဲ့ လွှတ်တော်မှာ ပြောရတော့မှာပေါ့ဗျာ”
တောင်ဥက္ကလာပ မြို့နယ် အပါအဝင် ရန်ကုန်တိုင်း မြို့နယ် အများစုမှာ ပြီးခဲ့တဲ့ သီတင်းပတ်က ရပ်ကွက် အုပ်ချုပ်ရေးမှူး အတော်များများကို အသစ်ပြောင်းလဲ ခန့်အပ်ခဲ့ရာမှာ အားလုံးဟာ ကြံ့ခိုင်ဖွံ့ဖြိုးရေး ပါတီဝင်တွေ ဖြစ်ကြပါတယ်။ အရင် စစ်အစိုးရလက်ထက် ရပ်ကွက်နဲ့ ကျေးရွာ အုပ်ချုပ်ရေးမှူးတွေမှာ ကြံ့ခိုင်ဖွံ့ဖြိုးရေး ပါတီဝင် မဟုတ်သူတွေလည်း ပါဝင်ခဲ့ပါတယ်။
No comments:
Post a Comment