စက်ရုံကြိုပို့ကား တိမ်းမှောက်မှုကြောင့် ကိုယ်ဝန်ဆောင်သည်များပါ သေဆုံးခဲ့ပြီး စက်ရုံပိုင်ရှင်က တစုံတရာ လျော်ကြေးပေး ဆေးကုသခြင်းမရှိကြောင်း ဝန်ထမ်းတဦးက ပြောသည်။
ကားတိမ်းမှောက်မှုကြောင့် ဒဏ်ရာ ရထားသူတဦး
“အချိန်ပိုဆင်းပြီးပြန်လာတဲ့အချိန် ည ၉ နာရီလောက်မှာဖြစ်တာ၊ ဒညင်းကုန်းလမ်းဆုံမရောက်ခင်မှာ ကားသမားက ရှေ့ကားကို ကျော်တက်ရင်း ကွန်တင်နာ တင်လာတဲ့ကားနဲ့ချိတ်မိပြီး မှောက်သွားတာ၊ နေရာမှာဘဲ တယောက်ပွဲချင်းပြီးသေတယ်၊ နောက်ထပ်သုံးယောက်က ဆေးရုံမှာ ဆုံးသွားတာ၊ ဒါဏ်ရာရသူတွေလဲ အများကြီးဘဲ” ဟုပြောသည်။
အခင်းဖြစ်ပွားစဉ် ဒေါ်ယုကြည်(၄၅) နှစ်မှာ နေရာတွင် ပွဲချင်းပြီး သေဆုံးခဲ့ပြီး ဒေါ်အေးမြင့် (၄၂) နှစ်၊ မသီတာဝင်း(၂၂) နှစ်၊ ကိုယ်ဝန် (၅) လနှင့် မ၀င်းမာစန်း(ခ) လွင်မာဦး(၂၅) နှစ်တို့မှာ ဆေးရုံတွင် ထပ်မံသေဆုံးခဲ့ကြောင်း ၎င်းဝန်ထမ်းက ဆက်ပြောသည်။
ထို့အပြင် နှင်းပပအေး (၂၁)နှစ်၊ ဘယ်ဘက်ပုခုံးအဆစ် ပြုတ်။ သန်းစန္ဒာထွေး (၂၄)နှစ်၊ ဦးခေါင်းထိ ဘယ်ဘက်နံရိုး အမှတ်(၂) ကနေ အမှတ်(၁၁) ထိကျိုး။ သန္တာလင်း (၂၇) နှစ် နံရိုးက သားအိမ်ကို ထိုးမိသည့်အတွက် သားအိမ်ထုတ်ရ။ သူဇာလင်း ရန်ကုန်ဆေးရုံကြီး အရေးပေါ်ဌာနရောက်နေပြီး ဦးခေါင်းထိ၊ သရက်ရွက်ကြွေ၊ နှလုံးထိ၊ နံရိုးကျိုး၊ တင်ပဆုံထိ။ မ၀င်းခိုင် (၁၈) နှစ် ဘယ်ဘက်ခေါင်းထိ။ နှင်းပွင့်ဖြူ (၁၆) နှစ် ညာဘက်လက်သန်း၊ လက်သကြွယ်၊ လက်ခလယ် ပြတ်တောက်ပြီး အသီးသီး ဆေးရုံတင် ထားရသည်။
စက်ရုံအလုပ်သမားများနေဖြင့် ယင်းကဲ့သို့ ထိခိုက်ဒါဏ်ရာခံစားနေသော်လည်း စက်ရုံပိုင်ရှင်ဘက်မှ တာဝန်ယူမှု တစုံတရာမရှိကြောင်း ဝန်ထမ်းက ဆက်ပြောသည်။
“စက်ရုံက အခုထိဆေးဝါးကုသဖို့ ကုန်ကျစရိတ်ကို မပေးတော့ ဒါဏ်ရာရနေတဲ့ အလုပ်သမတွေ ဓါတ်မှန်ရိုက်ဖို့ ကုန်ကျစရိတ်မတတ်နိုင်တဲ့ အခြေအနေဖြစ်နေတယ်၊ စက်ရုံက ပါကင်ဌာန အလုပ်သမား ကျော်မင်းထွန်းတစ်ယောက်ကိုဘဲ ဆေးရုံကိုလွှတ်ပြီး ဆေးဖိုးငွေ အနည်းအကျဉ်းထုတ်ပေးတယ်၊ စက်ရုံတာဝန်ရှိတဲ့သူတွေ တယောက်မှ လာမကြည့်ကြဘူး၊ ကျော်မင်းထွန်းက စက်ရုံ မန်နေဂျာကို ဆေးဝယ်ဖို့ ဘောက်ချာတွေကို ဆရာဝန်တွေပေးထားပြီး ၀ယ်ဖို့ငွေလိုနေကြောင်း ဖုန်းဆက်အကြောင်းကြားတာကို မန်နေဂျာက ဖုန်းမကိုင်ဘဲနေတယ်” ဟု ဆက်ပြောသည်။
အဆိုပါ ဖြစ်ရပ်နှင့်ပတ်သက်၍ အလုပ်ရှင်ဘက်မှ အလုပ်ပြင်ပချိန်တွင် ဖြစ်ပွားသည့်အတွက် တာဝန်မရှိကြောင်း ပြောဆိုသည့်သတင်းများထွက်ပေါ်နေပြီး ဥပဒေလမ်းကြောင်းအရ အလုပ်သမားများအနေဖြင့် တစုံတရာ အကာကွယ်မရသည့်အခြေအနေ ကြုံတွေ့နေရလျှက်ရှိသည်။
No comments:
Post a Comment