“ကျနော်က ခြံထဲမှာ အလုပ်လုပ်တဲ့အချိန်၊ ဘကြီးက ထမင်းချက်နေတဲ့အချိန်မှာ စစ်သားတွေက ချောင်းပြီး ကျနော်တို့ကို ဖမ်းလိုက်တယ်” ဟု အဖမ်းခံရာမှ ပြန်လည်လွတ်မြောက်လာသူ အသက် ၁၈ နှစ်အရွယ်ရှိ ကျုံကွီးရွာသားတဦးက ပြောသည်။
လွန်ခဲ့သည့် ၁၀ နှစ်ခန့်က မွန်ပြည်နယ်အတွင်း ပေါ်တာဆွဲရသည့် ရွာသားများကို အထမ်းကိုယ်စီဖြင့် မြင်တွေ့ရစဉ်
အဖမ်းခံရသူများကို (၁၅ ကီလိုဝင်) ဆန်တပုံးစီ ထမ်းခိုင်းပြီး မထမ်းနိုင် လမ်းမလျှောက်နိုင်သည့် အသက် ၇၂ နှင့် အသက် ၆၀ အရွယ် လူကြီး နှစ်ဦးကို လမ်းခုလပ်တွင် ပြန်လွှတ်ပေးခဲ့သည်။
စစ်ကြောင်း သွားရာ လမ်းကြောင်းမှ အသက် ၈ ခန့် ကလေးငယ်တဦးကိုလည်း စစ်တပ်က ဖမ်းဆီး ခေါ်သွားခဲ့ပြီး ကလေး၏ မိခင်က ငိုယိုကာ ဖခင်နှင့် လူစားလဲမှ ပြန်လွှတ်ပေးခဲ့သည်ဟုလည်း သူက ပြောသည်။
ဘုရားသုံးဆူမြို့နယ် ကျုံကွီးရွာနှင့် မယ်ကသာရွာကြား ဆင်တဲရွာအနီးတွင် ခမရ (၅၆၃) စစ်ကြောင်းနှင့် ကေအင်ယူ လက်နက်ကိုင်အဖွဲ့ (ကေအင်အယ်အေ) တို့ နာရီဝက်ခန့် တိုက်ပွဲဖြစ်ပွားခဲ့ပြီး တစုံတရာထိ ခိုက်ဒဏ်ရာရ ရှိခြင်း မရှိကြောင်း သိရသည်။
“ည ၁၀ နာရီခွဲမှ မယ်ကသာရွာကို ရောက်တယ်။ ည ၁၁ နာရီမှာ နှစ်ယောက်တတွဲ ပြန်လွှတ်တယ်။ ကျနော်က နောက်ဆုံးမှ လွတ်တယ်။ ဒီသတင်းကို အပြင်ကို မပေါက်စေနဲ့လို့ ကျနော်တို့ကို ခြိမ်းခြောက်လိုက်သေးတယ်” ဟု ပြန်လွတ်လာသူက ပြောသည်။
ပေါ်တာအဖြစ် ဖမ်းဆီးသွားသော လူများကို ပေါ်တာကြေး အဖြစ် အခငွေကြေး တစုံတရာ ပေးခြင်း မရှိသည့်ပြင် အဖမ်းခံရသူတဦး၏ လက်ကိုင်ဖုန်းကိုလည်း စစ်တပ်မှ သိမ်းယူခဲ့သေးသည်ဟု သူက ပြောသည်။
ဘုရားသုံးဆူမြို့နယ် ကျုံကွီးရွာသို့ ရောက်ရှိလာသည့် ခမရ ၅၆၃ စစ်ကြောင်း ၁ မှာ ရခိုင်ပြည်နယ် အခြေစိုက် အနောက်ပိုင်းတိုင်း စစ်ဌာနချုပ် လက်အောက်ခံ တပ်ရင်း ဖြစ်သည်။
No comments:
Post a Comment