|  |  |  |
| Tuesday, 22 February 2011 00:00 |
 ထိုင်းနိုင်ငံ၊ ဘန်ကောက်မြို့အနီး ပတ္တရား ပင်လယ်ကမ်းခြေမှ ယာယီပတ်စ်ပို့ ရှိသည့် မြန်မာအလုပ်သမား တစ်ဦးကို ဒေသခံ ရဲစခန်းမှူးက ဖမ်းဆီးပြီး ဘတ်ငွေ (၁၂၀၀၀) တောင်းခံခဲ့ကြောင်း သိရသည်။ဖမ်းဆီးခံခဲ့ရသည့် မြန်မာအလုပ်သမားမှာ ပတ္တရား၊ Jomtian (၃)လမ်း အတွင်းရှိ Good Luck Inn မှ မြန်မာ အလုပ်သမား အောင်ဆန်းဦး ဆိုသူဖြစ်ပြီး ယခုလ (၁၇)ရက်နေ့က ရေပုလင်း သွားဝယ်ပြီး ပြန်လာရာတွင် ရဲကားဖြင့် ဖမ်းဆီး ခေါ်ဆောင်ခြင်း ခံခဲ့ရသည်။ ၄င်းအပြင် ထိုင်းလူမျိုး (၆)ဦးနှင့် အခြား မြန်မာ အလုပ်သမား (၁)ဦးလည်း ဖမ်းဆီးခံရပြီး ကားပေါ်တွင် ပါလာခဲ့သည်။ အောင်ဆန်းဦးက “ရဲစခန်း အချုပ်ထဲကို ၀င်တာနဲ့ အချုပ်ထဲကို အရင်ရောက်နေကြတဲ့ လူ (၆)ယောက်လောက်က ကျနော့်ကို ၀ိုင်းထိုးကြတယ်။ ပြီးတော့ ဖမ်းလာတဲ့ လူတွေ အကုန်လုံးကို ဆေးစစ်တယ်။ ထိုင်းတွေက မူးယစ်ဆေးဝါး သုံးတဲ့ လူတွေ ဖြစ်တယ်။ မိဘတွေက လာပြီးတော့ ဘတ် (၁၀၀၀၀)စီ ပေးပြီးတော့ နောက်နေ့မှာ လာရွေး သွားကြတယ်။ ကျနော်မှာ ယာယီပတ်စ်ပို့နဲ့ Work Permit ရှိပေမယ့် နှစ်ရက် နှစ်ည အချုပ်ခန်းထဲမှာ နေခဲ့ရတယ်။ ဘတ်ငွေ (၁၂၀၀၀) သူဌေးသား ကိုယ်တိုင် လာပေးပြီးတော့ ရွေးထုတ်ခဲ့တယ်” ဟုပြောပြသည်။ ဖမ်းဆီး ခံရသည့် အချိန်တွင် ယာယီပတ်စ်ပို့ အစစ်ကို မပြနိုင်ပဲ မိတ္တူကိုသာ ပြနိုင်ခဲ့သဖြင့် ဖမ်းဆီး ဖြစ်ကြောင်း ရဲစခန်းက ပြောသည်ဟု အောင်ဆန်းဦးက ပြန်ပြောပြသည်။ ၎င်း၏ ယာယီ ပတ်စ်ပို့မှာ Work Permit လုပ်ရန်အတွက် ဘန်ကောက်မြို့သို့ ပို့ထားရကြောင်း၊ ဖမ်းဆီး ခံရပြီးနောက် ဘန်ကောက်မြို့မှ ဆွေမျိုး တော်စပ်သူထံသို့ ဖုန်းဆက် အကြောင်းကြားခဲ့ရာ နောက်တနေ့တွင် ရဲစခန်းသို့ လာရောက်ပြီး ပတ်စ်ပို့ အစစ်ကို ပြသခဲ့ကြောင်း၊ သို့သော်လည်း ရဲစခန်းက ပတ်စ်ပို့နှင့် အတူ ရှိမနေခြင်းကို အကြောင်းပြပြီး ဘတ်ငွေ (၁၂၀၀၀) တောင်းခဲ့ခြင်း ဖြစ်ကြောင်း အောင်ဆန်းဦးက ဆက်ပြောပြသည်။ “ကျနော့်ရှေ့ မှာ ဘတ် (အလုပ်သမား လက်မှတ်) မရှိသူတွေ ပတ်စ်ပို့ မရှိတဲ့သူတွေ ဖမ်းလာတယ် ဘတ်ငွေ နှစ်ထောင်၊ သုံးထောင်လောက် ပေးရင် လွတ်သွားကြတာပဲ။ ကျနော်ကျတော့ ပတ်စ်ပို့ရော Work Permit ပါ ရှိလျှက်နဲ့ ဘတ် (၁၂၀၀၀)ပေးရတယ် ဆိုတော့ ကျနော်တို့ လုပ်ထားတဲ့ ယာယီပတ်စ်ပို့ဟာ ဘာမှ အဓိပ္ပါယ် မရှိတော့ဘူးလား။ အကာအကွယ် မပေးနိုင်တော့ဘူးလား” ဟု အောင်ဆန်းဦးက မကျေမချမ်း ဆိုသည်။ ပြီခဲ့သည့် ၂၀၀၉ ခုနှစ် ဒီဇင်ဘာလ (၁၆) ရက်နေ့ကလည်း ဘန်ကောက်မြို့၊ အယ်ကရှိုင် (၉၅)လမ်း အနီးရှိ ဘန်မကော်(၈) ဆေးရုံရှေ့တွင် ယာယီပတ်စ်ပို့နှင့် Work Permit ကိုင်ဆောင်ထားသည့် ကရင်အလုပ်သမား မောင်လုံထံမှ နယ်မြေခံ ရဲတစ်ဦးက ရိုက်နှက်ပြီး ဘတ်ငွေ (၆၀၀၀) လုယက် သွားခဲ့ကြောင်း သိရသည်။ အဆိုပါ ဖြစ်ရပ်အား ဘန်ကောက် အခြေစိုက် ထိုင်းနိုင်ငံရောက် မြန်မာနိုင်ငံသားများ အသင်းနှင့် ထိုင်းအန်ဂျီအို တစ်ခုတို့က ရဲကား နံပါတ်ကို အတိအကျ ပြောပြီး ဘန်ဘော် (၃) ရဲစခန်းတွင် အမှုဖွင့် တိုင်ကြားခဲ့သည်။ အမှုဖွင့်ခဲ့ပြီးနောက် ညနေပိုင်းတွင် ရဲစခန်းမှုက ဘတ်ငွေ (၁၀၀၀၀) ပေးလျှော်မည်ဖြစ်ပြီး အမှုအား ပိတ်ပေးရန် မောင်လုံ၏အစ်မ မအေးအေးဝင်း ထံသို့ ဖုန်းဆက် အကြောင်းကြားခဲ့သည်။ အမှုသည်များက မကျေနပ်သဖြင့် ဥပဒေအတိုင်း ဆောင်ရွက် ပေးပါရန် အလုပ်သမား အခွင့်အရေး ဆောင်ရွက်ပေးသည့် ထိုင်းအန်ဂျီအို တခုကို အကူအညီ တောင်းခဲ့သော်လည်း ယခုအချိန်အထိ သုံးလနီးပါး ကြာမြင့်လာသည့် တိုင်အောင် အမှုမှန် ပေါက်ပေါက်ခဲ့ခြင်း မရှိသေးကြောင်း သိရှိရသည်။ |
No comments:
Post a Comment